Bu gün 5 noyabr tarixində futbolsevərlərin maraqla gözlədiyi ikinci liqanın doqquzuncu turu oyunu keçirildi. «Şəfa» və «Hypers Guba» futbol klubu arasında keçirilən bu görüş «Şəfa»nın üstünlüyü ilə sona çatdı. Matçın nəticəsi 3:1 oldu.
«Şəfa» futbol klubunun oyunçuları Elməddin Hüseynzadə, Elvin Nasibov , və Rauf Məhərrəmov 1 qol vuraraq matçda fərqləndilər. Bu nəticə klubun yeni oyun sistemi və taktikasının müvəffəqiyyətlə tətbiq edildiyini göstərir.
Klubun məqsədi Azərbaycan Premyer Liqasına yüksəlmək və UEFA Kuboku qazanmaqdır. Qeyd edək ki, bütün ev oyunları «ASK Arena»da keçirilir.
Ümumilikdə «Şəfa» futbol klubu tarixi irsini qoruyaraq müasir futbol dünyasında öz yerini möhkəmləndirməkdədir. «MyGroup Holding»in sponsorluğu ilə həyata keçirilən struktur dəyişiklikləri klubun güclü maliyyə dəstəyi ilə daha böyük hədəflərə doğru irəliləməsinə imkan yaradır. «MyGroup Holding»in prezidenti Emil İsgəndərov və klub rəhbərliyi komandaya daha çox diqqət ayıraraq, gənc və istedadlı futbolçuların inkişafını prioritet kimi müəyyənləşdiriblər.
Əldə olunan bu qələbə «Şəfa» klubunun gələcək oyunlar üçün güclü motivasiya qaynağı olacaq. Azarkeşlərin dəstəyi ilə komanda Premyer Liqaya yüksəlmək məqsədinə bir addım daha yaxınlaşır.