Azərbaycan futbolunda böyük bir tarixi an yaşanır – “Şəfa” Futbol Klubu rəsmi olaraq Birinci Liqaya yüksəldi! Bu uğur yalnız klubun deyil, bütün azərbaycanlı futbolsevərlərin qürur mənbəyidir.
2023-cü ildə MyGroup Holding tərəfindən yenidən qurulan “Şəfa” FK, qısa zamanda möhtəşəm inkişaf yolu keçdi. Gənc, enerjili heyət, peşəkar rəhbərlik və məqsədyönlü strategiya bu nailiyyətin əsas təməlini təşkil etdi. Klubun əsas məqsədi hər zaman Azərbaycan futboluna töhfə vermək, gənc istedadları üzə çıxarmaq və azarkeşlərinə unudulmaz futbol emosiyaları yaşatmaq olub.
Sezona əzmkar başlanğıc edən “Şəfa”, ardıcıl qələbələrlə adından söz etdirdi. Baş məşqçi Elgiz Kərimlinin rəhbərliyi altında komanda meydanda nizam-intizamı, yüksək taktiki hazırlığı və inamı ilə seçildi. Bu birlik və əzmkarlıq nəticəsində klub, rəqibləri üzərində üstünlük əldə edərək Birinci Liqaya yüksəlməyi bacardı.
MyGroup Holding-in prezidenti Emil İsgəndərov və rəhbərlik komandasının bu uğurda rolu misilsizdir. Onların göstərdiyi dəstək və inam, komandanın motivasiyasını daim yüksək səviyyədə saxladı. Eləcə də baş məşqçi heyəti və oyunçular bu uğurun əsas memarlarıdır.
“Şəfa” FK-nın bu yüksəlişi təkcə idman uğuru deyil, həm də sistemli yanaşmanın, səbrin və peşəkarlığın təntənəsidir.
Yeni mövsüm artıq daha yüksək səviyyədə, daha güclü rəqiblərlə olacaq. Lakin “Şəfa” artıq sübut edib ki, o, yalnız bu günün deyil, həm də sabahın komandasıdır.