Apple artıq dördüncü ildir ki, dünyanın ən dəyərli qlobal brendləri reytinqinə başçılıq edir. Bu barədə Kantar adlı analitik şirkət məlumat verib.
My-news.az Technote.az-a istinadən xəbər verir ki, brendin dəyəri 1.3 trilyon dollara çatıb, bu da ötən ilin göstəricisindən 28% daha çoxdur. Hazırda Apple, BrandZ-in ilk 100-lüyündə yer alan şirkətlərin ümumi dəyərinin 12%-dən çoxunu təşkil edir. Kantar mütəxəssisləri qeyd edirlər ki, Apple “mənalı, unikal və yadda qalan” (Meaningful, Different and Salient) xüsusiyyətlərə malikdir. Tədqiqat metodologiyasına əsasən, məhz bu keyfiyyətlər brendin güclü qalmasına və şirkətin qlobal bazarda iqtisadi qeyri-sabitlik və kəskin rəqabət şəraitində liderliyini qorumasına imkan verir.
BrandZ hesabatının əsas tendensiyalarından biri süni zəka ilə bağlı brendlərin sürətlə yüksəlməsi olub. NVIDIA, bir il ərzində dəyərinin 152% artması nəticəsində beşinci yerə yüksəlib. OpenAI tərəfindən yaradılan ChatGPT isə reytinqə birbaşa 60-cı yerdən daxil olub və 43.5 milyard dollar dəyərində qiymətləndirilib. Kantar bildirir ki, süni zəka texnologiyaları marketinq, məhsul inkişafı və media strategiyalarını köklü şəkildə dəyişir. Bu texnologiyaları uğurla tətbiq edən şirkətlər arasında Coca-Cola, Reckitt və PepsiCo da mövcuddur.
Bu brendlər süni zəkadan reklam kampaniyalarının lokallaşdırılması, yeni məhsulların yaradılması və biznes proseslərinin optimallaşdırılması məqsədilə istifadə edirlər. Qeyd edək ki, BrandZ reytinqi artıq 20 ilə yaxın müddətdir tərtib olunur və burada şirkətlərin maliyyə göstəriciləri ilə yanaşı, istehlakçılar tərəfindən brendin qavranılması da nəzərə alınır. Bu il, top-100-də yer alan şirkətlərin ümumi dəyəri 29% artıb ki, bu da qlobal bazarın iqtisadi qeyri-müəyyənlik dövründən sonra bərpa olunmasını əks etdirir.