ABŞ-ın siyasi həyatında aktiv iştirakdan yenicə geri çəkilmiş milyarder Elon Musk ona xas olan enerjisi ilə rəhbərlik etdiyi şirkətlərin fəaliyyətinə yenidən fəal şəkildə qatılıb.
My-news.az Technote.az-a istinadən xəbər verir ki, onun sözlərinə görə, rəhbərlik etdiyi aerokosmik şirkət SpaceX bu il 15,5 milyard dollar gəlir əldə edəcək və kommersiya buraxılışlarından əldə etdiyi gəlir baxımından gələn il NASA-nın ümumi büdcəsini geridə qoyacaq.
Musk bildirib ki, bu il əldə ediləcək 15,5 milyard dolların təxminən 1,1 milyard dolları NASA-nın sifarişləri hesabına formalaşacaq. Bu kimi açıqlamalar, insanlıq tarixində ən bahalı startaplardan biri sayılan SpaceX-in maliyyə göstəricilərinə nadir bir baxış imkanı yaradır.
Ötən ilin nəticələrinə əsasən, SpaceX-in gəliri analitiklərin qiymətləndirmələrinə görə 11,8 milyard dollar ilə 15 milyard dollar arasında dəyişib. Şirkət 2023-cü ildə təkrar istifadə olunan Falcon raketləri ilə rekord sayda – 134 buraxılış həyata keçirərək kommersiya buraxılışları bazarının liderinə çevrilib.
Keçən həftə məlum olub ki, cari ilin sonunadək SpaceX ümumilikdə 170 buraxılış həyata keçirməyi planlaşdırır. Hazırda şirkətin əsas gəlir mənbəyi onun törəmə qurumu olan Starlink-dir. Starlink aşağı orbitli peyk qruplaşması üçün rabitə peyklərini müntəzəm şəkildə Falcon raketləri ilə kosmosa göndərir.
Gələcəkdə isə SpaceX, sabiq ABŞ prezidenti Donald Trump tərəfindən təşviq edilən və “Qızıl Günbəz” (Golden Dome) adlanan hərbi raketdən müdafiə sistemi layihəsinin baş podratçılarından birinə çevrilə bilər.