YouTube videoplatforması moderasiya siyasətində dəyişiklik edərək, artıq qaydaları potensial olaraq poza biləcək, lakin ictimai maraq daşıyan məzmunu silmir.
My-news.az Technote.az-a istinadən xəbər verir ki, əgər ifadə azadlığının qorunması zərər riskindən daha vacib hesab olunarsa, həmin məzmun platformada qalır.
Bu dəyişikliklər seçkilər, ideologiyalar, ictimai hərəkatlar, irq, cinsiyyət, seksual yönüm, abort, immiqrasiya və senzura kimi mövzuların daha açıq şəkildə müzakirəsinə şərait yaradır.
YouTube-un nümayəndəsi Nikol Bell bildirib ki, bu addım ABŞ-da 2024-cü il seçkiləri ərəfəsində tətbiq olunmuş dəyişikliklərin davamıdır. Həmin dəyişikliklərə əsasən, siyasi namizədlərin qaydaları pozan bəzi məzmunları belə platformada saxlanıla bilər.
Bell əlavə edib:
“İctimai maraq anlayışının zamanla dəyişdiyini nəzərə alaraq, bu istisnalarla bağlı tövsiyələrimizi mütəmadi olaraq yeniləyirik. Məqsədimiz dəyişməz olaraq qalır: YouTube-da ifadə azadlığını qorumaqla yanaşı, açıq-aşkar zərərin qarşısını almağa çalışırıq.”
Yeni siyasətin tətbiqindən sonra əldə olunan konkret nəticələr də açıqlanıb. Məsələn, COVID peyvəndi ilə bağlı səhiyyə nazirinin siyasətindəki dəyişiklikləri əks etdirən video silinməyib, çünki ictimai maraq həmin məlumatın paylaşılmasını əsaslandırıb. Eyni zamanda, ABŞ hökumət rəsmiləri haqqında hazırlanmış və 43 dəqiqə davam edən, içərisində transgender şəxslərə qarşı təhqiramiz ifadələr yer alan video da platformada qalmağa davam edib.