Google, süni zəka əsaslı çat-botu Gemini-yə statik fotoları 8 saniyəlik videolara çevirmə funksiyası əlavə edib.
My-news.az Technote.az-a istinadən xəbər verir ki, bu imkan “Veo 3” adlı video modeli əsasında işləyir və yaradılmış videolara fon səsləri, ətraf mühit səsləri və hətta nitq kimi audio müşayiətlər əlavə edə bilir.
Fotodan video yaratmaq prosesi olduqca sadədir. Bunun üçün sadəcə çat-botun alətlər menyusundan “Video” bölməsini seçmək və istədiyiniz şəkli yükləmək kifayətdir. Daha sonra videoda nə görmək və eşitmək istədiyinizi təsvir edən bir mətn əlavə olunur. Nəticədə sizə MP4 formatında, 720p keyfiyyətində və 16:9 nisbətində bir video təqdim edilir.
Hazırkı versiyada bütün videolara süni zəka tərəfindən yaradıldığını göstərən görüntülü su nişanı əlavə olunur. Bundan əlavə, SynthID adlı görünməz rəqəmsal su nişanı da videoya daxil edilir. Bu, məzmunun süni zəka vasitəsilə yaradıldığını texniki olaraq təsdiqləyir.
Sözügedən funksiya artıq Google AI Ultra və Pro ödənişli abunə paketləri çərçivəsində bəzi ölkələrdə əlçatandır. Şirkət bir həftə ərzində bu funksiyanın mobil cihazlarda da istifadəyə veriləcəyini bildirib.