iPhone 17 ilə bağlı yeni texniki xüsusiyyətlərə dair şayiələr yayılmağa başlayıb.
My-news.az Technote.az-a istinadən xəbər verir ki, Apple-ın bu smartfonu artıq bu payız təqdim edəcəyi gözlənilir. GF Securities analitiki Jeff Pu öz proqnozlarını yeniləyib və iddia edir ki, cihazda əvvəlcə ehtimal edilən A18 prosessoru əvəzinə daha müasir Apple A19 çipi istifadə olunacaq. Bu prosessor həmçinin iPhone 17 Air modelində də quraşdırılacaq. Əvvəllər yeni modeldə iPhone 16-da tətbiq olunan A18 çipinin saxlanılacağı düşünülürdü. Lakin A19 prosessoru daha yüksək məhsuldarlıq və enerji səmərəliliyi təklif edir ki, bu da xüsusilə mürəkkəb tətbiqlər, oyunlar və süni intellekt funksiyaları üçün əhəmiyyətlidir.
iPhone 17-nin baza modeli və iPhone 17 Air LPDDR5 standartlı 8 GB RAM ilə təchiz olunacaq. Daha güclü versiyalar olacaq iPhone 17 Pro və Pro Max isə LPDDR5X texnologiyalı 12 GB RAM-a sahib olacaq. Əlavə olaraq, Apple bu modellərdə özünün istehsal etdiyi Wi-Fi 7 çipindən istifadə etməyi planlaşdırır. Yeni naqilsiz bağlantı texnologiyası daha yüksək sürət və stabil əlaqə təmin edəcək ki, bu da xüsusilə streaming, oyunlar və bulud əsaslı xidmətlərlə işləmək üçün böyük üstünlük sayılır.
iPhone 17-nin baza versiyası 120 Hz yenilənmə tezliyinə malik 6.3 düymlük OLED ekranla təchiz ediləcək. Bununla belə, bu ekran Pro modellərdən fərqli olaraq LTPO (ProMotion) texnologiyasını dəstəkləməyəcək. Qeyd olunan texnologiya ekranın yenilənmə tezliyini dinamik şəkildə tənzimləməklə enerji sərfiyyatına qənaət etməyə imkan verir.