Bu gün «Fritz-Valter» stadionunda keçirilən media günündə «Kayzerslautern» klubunun 2025/26 mövsümünə dair yeni komanda şəkli və futbolçuların portretləri çəkilib.
My-news.az İdman.biz-ə istinadən xəbər verir ki, tədbirdə II Bundesliqa təmsilçisinin yeni transferlərindən biri – Azərbaycan millisinin hücumçusu Mahir Emreli də iştirak edib.
Komandanın yeni oyunçularından yalnız biri – İvan Prtayin fotosessiyada yer almayıb. Lakin bu, xoş səbəbdən baş verib: xorvatiyalı forvard həyat yoldaşı ilə birlikdə ilk övladlarının doğumunu gözlədiyi üçün toplanışda iştirak etməyib.
Mahir Emrelidən əlavə, digər yeni transferlər – Fabian Kunze, Maksvell Gyamfi, Semih Şahin və Simon Asta üçün də bu, “Qırmızı şeytanlar”ın forması ilə ilk rəsmi fotosessiya olub.