Meta Platforms şirkətindən olan tədqiqatçılar kompüterə jestlər vasitəsilə nəzarət etməyə imkan verən innovativ qolbaq üzərində çalışırlar.
My-news.az Technote.az-a istinadən xəbər verir ki, bu cihaz vasitəsilə siçan kursorunu hərəkət etdirmək, tətbiqləri işə salmaq və havada karandaşla yazılmış kimi mesajlar göndərmək mümkün olacaq.
Qolbaq səthi elektromioqrafiya (sEMG) texnologiyasından istifadə edir. Bu texnologiya istifadəçinin əzələ aktivliyi nəticəsində yaranan elektrik siqnallarını analiz edərək onun hərəkətlərini şərh edir. Beləliklə, cihaz insanın fiziki olaraq hərəkət etməsindən əvvəl belə, onun nə edəcəyini proqnozlaşdıra bilir.
Qolbaq əsasən hərəkət imkanları məhdud olan şəxslər üçün kompüterlə rahat və səmərəli ünsiyyət qurmağa kömək edən vasitə kimi hazırlanır.
Meta bu layihəni Karnegi Mellon Universiteti ilə əməkdaşlıq çərçivəsində həyata keçirir. Hazırda cihaz onurğa beyni zədələnmiş insanlar üzərində test edilir. Tədqiqatçılar bildirirlər ki, hətta qolları tam iflic olmuş şəxslərdə belə müəyyən əzələ aktivliyi müşahidə olunur. Məhz bu aktivlik sayəsində qolbaq istifadəçinin etmək istədiyi hərəkətləri düzgün şərh edə bilir.
Meta-nın təqdim etdiyi bu texnologiya, beyin implantı üzərində qurulmuş Neuralink sisteminə nisbətən daha sadə və qeyri-invaziv alternativ sayılır. Belə ki, Neuralink çipi insan beyninə cərrahi müdaxilə ilə yerləşdirildiyi halda, Meta-nın qolbağından istifadə etmək üçün heç bir əməliyyata ehtiyac yoxdur.
Hazırda cihazın nə vaxt kommersiya məqsədilə istifadəyə veriləcəyi ilə bağlı rəsmi məlumat yoxdur.