Yeni məlumata əsasən, Samsung şirkəti Galaxy S25 FE smartfonunu satışa çıxarmağa hazırlaşır və bu modeli ənənəvi təqdimat cədvəlindən daha tez təqdim etməyi planlaşdırır.
My-news.az Technote.az-a istinadən xəbər verir ki, böyük ehtimalla, cihaz yaxın iki ay ərzində ictimaiyyətə təqdim olunacaq.
Samsung Mobile Experience bölməsinin direktoru gəlirlərlə bağlı keçirilən daxili iclas zamanı Galaxy S25 FE modelinin planlaşdırılandan daha tez təqdim ediləcəyini bildirib. Gözləntilərə görə, bu smartfon Exynos 2400 prosessoru, 8 GB RAM, 128 GB daxili yaddaş ilə təchiz olunacaq və 45 vatt gücündə sürətli şarj texnologiyasını dəstəkləyəcək.
Bu erkən təqdimatın məqsədi, böyük ehtimalla, ilin sonuna yaxın artan rəqabətə cavab vermək və orta seqmentdə məhsul çeşidini genişləndirməkdir. Bununla belə, başqa mümkün səbəb də irəli sürülür: payız-qış mövsümündə Galaxy Tab S11 Ultra flaqman planşeti, XR cihazı və üçqat qatlana bilən smartfon daxil olmaqla bir neçə səs-küylü təqdimat planlaşdırılıb. Şirkət bu təqdimatların informasiya məkanında bir-birini kölgədə qoymaması üçün onların vaxtını bir-birindən ayırmağa çalışa bilər.