Google-un süni intellekt tətbiqi Gemini uşaqlar üçün fərdi illüstrasiyalarla müşayiət olunan səsləndirilmiş nağıl kitabları yaratmağa imkan verən yeni funksiyanı təqdim edib.
My-news.az Technote.az-a istinadən xəbər verir ki, istifadəçilər mətn sorğusu vasitəsilə süni intellektə istədikləri hekayənin yazılmasını tapşıra bilərlər. Gemini, hekayələrin yaradılmasında istifadəçinin təqdim etdiyi fotoşəkillərdən, təsvirlərdən və digər fayllardan ilham mənbəyi kimi istifadə edə bilir. Məsələn, Günəş sisteminin quruluşunu izah edən və ya kiçik bacı-qardaşlara qarşı mehriban davranışın vacibliyini izah edən hekayələr yaratmaq mümkündür. Hətta uşaq rəsmləri əsasında tam nağıl toplusu yazdırmaq da olar.
Hazır hekayəyə ön baxış imkanı təqdim olunur. Google-un məlumatına görə, bu cür nağıl kitabının yaradılması cəmi bir neçə dəqiqə vaxt aparır. Daha sonra Gemini istifadəçiyə iki sütunlu Canvas üslubunda interfeys təqdim edir: ekranın sağ tərəfində kitab, sol tərəfində isə çat bölməsi yerləşir.
İstifadəçilər illüstrasiyalar üçün müxtəlif tərtibat üslubları arasında seçim edə bilərlər: pikselli qrafika, komiks üslubu, plastilin animasiyası, naxışlar, rəngləmə və s. Nəticədə illüstrasiyalar və səsləndirmə ilə müşayiət olunan 10 səhifəlik fərdi nağıl kitabı ərsəyə gəlir. Kitabı müxtəlif tonlarda səsləndirmək mümkündür — daha yüksək və ya alçaq səslə.
Hazır nağıl kitabını keçid linki ilə paylaşmaq və ya çap üçün yükləmək də mümkündür.
Bu yeni funksiya 45 dili dəstəkləyir və bütün dünyada – həm Gemini-nin mobil tətbiqi, həm də masaüstü versiyası vasitəsilə – əlçatandır.