Tesla hazırda Full Self-Driving (FSD) avtopilot sistemi üçün yeni süni intellekt (AI) modelini öyrədir.
My-news.az Technote.az-a istinadən xəbər verir ki, yeni model video keyfiyyətinin əhəmiyyətli dərəcədə yaxşılaşdırılması və ölçüsünün artırılması ilə seçiləcək. Bu barədə şirkətin baş direktoru Elon Musk məlumat verib.
“Tesla, FSD üçün yeni modeli təxminən 10 dəfə daha çox parametrlə və videonun sıxılması zamanı məlumat itkisini əhəmiyyətli dərəcədə azaldacaq şəkildə öyrədir. Testlər uğurla başa çatsa, model ehtimal ki, gələn ayın sonunda ictimai istifadəyə hazır olacaq”, – deyə Musk X (əvvəlki Twitter) sosial şəbəkəsində paylaşım edib.
FSD sistemi, Tesla avtomobillərinə minimal sürücü müdaxiləsi ilə yol şəraitində naviqasiya və manevr etməyə imkan verir. Lakin hazırkı mərhələdə sürücü sükanı əlində saxlamalı, istənilən anda müdaxilə etməyə və ya əyləcə basmağa hazır olmalıdır. FSD, sürücüyə yardım edən ənənəvi avtopilot sisteminə alternativ hesab olunur və bu sistem Avropa və Çin bazarlarında da quraşdırıla bilər.
FSD texnologiyasının əsasını Tesla-nın süni intellekt modeli təşkil edir. Bu model elektromobilin kameraları və sensorlarından gələn məlumatların emalına cavabdehdir. Parametrlərin sayının artırılması modelin daha böyük məlumat bazasında öyrədildiyini və imkanlarının əhəmiyyətli dərəcədə genişləndirildiyini göstərir.
Elon Musk ənənəvi olaraq FSD sistemini Tesla-nın gələcək strategiyasının əsas elementi hesab edir. Lakin bu yanaşma Çindən olan güclü rəqiblərin artan təzyiqi fonunda şirkəti qorumağa kifayət etməyib. Tesla hələ də gələcəyini avtopilot texnologiyaları ilə bağlayır, lakin əsas fəaliyyəti – elektromobil satışı – çətin dövr yaşayır.
2025-ci ilin ikinci rübünün nəticələrinə əsasən, Tesla-nın xalis mənfəəti 16% azalıb, Avropada isə satışlar kəskin şəkildə düşüb. Şirkət üçün digər mənfi faktor isə Elon Musk-ın siyasi fəaliyyəti olub – ilin əvvəlindən bu yana Tesla-nın səhmləri 23,55% dəyər itirib.