Cənubi Koreya mənbələrinin məlumatına görə, Samsung yalnız Android XR platforması üzərində inkişaf etdirdiyi Project Moohan XR cihazı ilə kifayətlənmir.
My-news.az Technote.az-a istinadən xəbər verir ki, şirkət 2026-cı ilin sonuna qədər kütləvi istifadə üçün nəzərdə tutulmuş, daha sadə və əlçatan ağıllı eynək istehsalına başlamağı planlaşdırır.
Yeni modelin dizayn baxımından Ray-Ban Meta ağıllı eynəyinə bənzəyəcəyi bildirilir. Bu cihazda da ekran olmayacaq, lakin daxili mikrofon, səsgücləndiricilər və kamera ilə təchiz olunacaq. Ağıllı eynək süni intellekt köməkçisi ilə təchiz ediləcək və istifadəçiyə zəng etmək, mətn mesajları göndərmək, məzmun yaratmaq və multimedianı idarə etmək imkanı verəcək.
Ekranın olmaması bəzi funksional məhdudiyyətlər yaratsa da, cihazın əlçatan qiyməti onun geniş auditoriya tərəfindən qəbul edilməsinə töhfə verə bilər. Məsələn, Ray-Ban Meta-nın ən son versiyası hazırda 299 ABŞ dollarından başlayan qiymətlərlə satılır.
Samsung-un fikrincə, bu tip ağıllı eynəklər gələcəkdə real vaxtda görüntü ötürmək və daimi taxıla bilən rahat qurğu kimi istifadə olunaraq, smartfonların funksiyalarını əvəz edə bilər. Bu yanaşma mobil cihazların fiziki və funksional məhdudiyyətlərini aşmaq məqsədi daşıyır.
Bir zamanlar yalnız texnoloji aksesuar kimi qəbul edilən ağıllı eynəklər, 2022-ci ilin sonunda ChatGPT kimi süni intellekt çat-botlarının istifadəyə verilməsi ilə yeni mərhələyə qədəm qoyub. Bu texnoloji inkişaflar, həmçinin eynəklərin funksional imkanlarının və istifadə rahatlığının artması ilə yanaşı, onların sürətlə populyarlaşmasına səbəb olub.
Fortune Business Insights tədqiqat şirkətinin proqnozuna əsasən, 2025-ci ildə 253,5 milyard ABŞ dolları həcmində qiymətləndirilən ağıllı eynəklər bazarının 2032-ci ilə qədər 1,6 trilyon dollara çatacağı gözlənilir.