Chery tamamilə yenidən dizayn edilmiş QQ3 modelini nümayiş etdirib.
My-news.az Donanimhaber-ə istinadən xəbər verir ki, ilin sonuna qədər Çində satışa çıxması gözlənilən avtomobil, “gənclər üçün ilk avtomobil” konseptini davam etdirən QQ seriyasının ən yeni üzvü olacaq.
Yeni nəsil Chery QQ3 yuvarlaq xətləri və ikiqat üfüqi gündüz işıqları ilə tamamlanan oval fənərləri ilə seçilir. Avtomobilin arxa işıqları da oval formadadır və faralara uyğun dizayn olunub. Yan tərəfdən baxıldıqda, model Smart №1-ə xatırladır; təkər bazası 2700 mm, uzunluğu isə 4200 mm-dən çoxdur. Avtomobil Chery-nin T12 platforması üzərində qurulub.
Yeni QQ3, 90 kVt (121 at gücü) gücündə arxa elektrik mühərriki ilə təchiz edilib. Lakin batareyanın tutumu və avtomobilin hərəkət diapazonu hələ açıqlanmayıb.
Kokpit dizaynında düz alt sükan, oval hava ventilyatorları, düzbucaqlı alətlər qrupu və 15,6 düymlük 2,5K təsvir ölçülü sensor ekranlı multimedia displey yer alır. Bu displey Qualcomm Snapdragon 8155 çipi ilə işləyir və süni intellekt əsaslı səs köməkçisi ilə təchiz olunub.
Avtomobil həmçinin OTA yeniləmələri, 256 rəngli mühit işıqlandırması, 50 Vt simsiz enerji doldurma, CarPlay, HiCar və CarLink mobil əlaqəsi imkanlarına malikdir. Bundan əlavə, Chery Falcon 500 qabaqcıl sürücü yardım sistemi avtomobilin təhlükəsizliyini artırır və yüksək sürətli NOA (Avtopilotda Naviqasiya) funksiyasını dəstəkləyir.
